موسم الفرح الثامن مع مدرسة الرقص الأولى
حجم الخط:
فرحوا من جديد .. فراشات وفرسان مدرسة الرقص الأولى وعلى مدى يومين فرحوا و أفرحوا معهم مدينة اللاذقية..
رغم التعب وقطرات العرق .. فرحوا وأفرحوا.. رقصوا كما لم يفعلوا من قبل .. كيف لا !.. ومن ورائهم مدرب وفنان قدير لا يبخل على طلابه ومدرسته بكل جهد .. ليخرج حفلهم على أبهى صورة وأحسن تنظيم.
تحت رعاية كريمة للرفيق المهندس سيف الدين سلمان وقيادة فرع الاتحاد الرياضي باللاذقية وبحضور الدكتور المهندس عمار الأسد نقيب مهندسي اللاذقية أقامت مدرسة الرقص الأولى باللاذقية حفلها السنوي الثامن على مدى يومي الخميس 29 والجمعة 30 نيسان وبحضور جماهيري كبير التهبت أياديه تصفيقا وتشجيعا لهؤلاء الفراشات والفرسان الذين رقصوا بفرح كعادتهم محلقين في عوالم الإبداع والتناغم.
بدأ حفل اليوم الأول بإحماء لم يخلُ من الإتقان والجمال , ثم كانت كلمة للمدرب والفنان عمار حنا حكى فيها عن تجربة عام مضى ثم كان توزيع شهادات موقعة من الاتحاد الرياضي العام لتثبيت سنوات الاشتراك والخبرة للمشتركين وقد قام بتسليم الشهادات رئيس وأعضاء فرع الاتحاد الرياضي العام والسيد الدكتور نقيب المهنسين, ثم تابع المدرب عمار كلمته بشكر رعاة الحفل من فعاليات رسمية وتجارية واعلامية .وذكر أنه لن يشارك هذا العام بكثافة بسبب إصابة في الركبة ألمت بشريكته كنانة , نقول – باسم موقعنا- للرائعة كنانة سلامات ونراك قريبا تعودين إلى الألق الذي نعرفه عنك.
ثم بدأت مجموعة الكبار برقصة فالس جماعي أبهرت مشاهديها بدقة تنفيذها وجمال أزيائها وبهاء ألوانها وبعدها كانت رقصة الصيصان لملائكة المدرسة الصغار وخلا المسرح بعدها لإبداع عمار جعفر وشريكته ندى برقصة فالس أكدت حرص هذا الزوجي على الارتقاء بهذا الفن إلى سماوات إبداعية جديدة دائماً, أما كيف سأروي لكم حكاية رامي سعد وشريكته الياسمينة فهذا ما سيصعب مهمتي في هذا المقام: رامي وياسمين لحن واحد و معادلة صعبة لا يعرف حلها إلاهُما برقصتهم المعاصرة التي قاطعها الجمهور عدة مرات بالتصفيق الحار والهتافات التشجيعية المتكررة.
وفي اليوم الثاني:
وكأن اليوم الأول – على روعته وإتقانه – لم يكُ إلا تحمية وتدريباً لليوم الثاني الذي فاق كل التوقعات – حتى توقعاتنا نحن الذين تابعنا التدريبات والتحضيرات اولاً بأول – الكل بدون مبالغة كان نجم الحفل .. ولكن بعض الفراشات والفرسان تفوقوا على أنفسهم بمرات وهذا ماأذهل حتى مدربهم الذي شكر الزوجي الجميل رامي وياسمين وأسماهم " الزوجي الذهبي" اللقب الذي استحقاه بجدارة , ثم شكر أيضا الزوجي عمار جعفر مع شريكتيه ندى وهيفاء , وقد أبدع هؤلاء الفراشات والفرسان في كل رقصاتهم من المعاصرة إلى التانغو والروك وكانت الرقصات تعبر عن لوحات تمثيلية ابتدعوها مثل حكاية التمثال الذي نحته رامي في غفلة من الزمن وأنجز به ياسمينته التي تخلت عن جمودها كتمثال ورقصت معه بإبداع حتى انتهى به الأمر نائما تحت رجليها لا يعرف إن كان قد رقص بالفعل مع تمثاله أم تخيل ذلك.
وقد برز من الفراشات والفرسان في الرقصات الجماعية الجميلة كلاً من ندى ,دينا ودوللي ,و وقد سما الأطفال مريم و يارا برقصتهم التشيكية و الطفلة الواعدة زينب قاسم و الزهرة المتفتحة غفران علي والبرعم الجميل مريم عجيل بأداء لافت للباليه الرائع, الذي أتقنوه ..وكانت ديما منى تشع كعادتها كنجمة اللاذقية للباليه, واستضاف الحفل زوجي رقصا التانغو بجمال هما جورج وبراسكا, وقد رقص المدرب والفنان عمار حنا مع كل من رهف ودينا رقصات التانغو والباسودبل والسالسا وكان الختام برقصة رويدا متقنة سبقتها تحية الصغار وصورة الختام لذكرى لن تنسى.
يذكر بأن الحفل كان بتقديم جميل من ابنة المدرسة رنا يوسف وهي التي تعرف ماهية الرقص والتي شجعت الجميع بصدق, وقد كان الحفل برعاية كل من: موقع اللاذقية الاخباري LAttakiaNews , الوليد للتصميم والطباعة ومواقع الانترنت, فندق السمان, قناة مسايا الفضائية, قناة الدنيا الفضائية, وصلّي لخدمات التوصيل, الشريف لأقمشة السهرة والعرائس,جان موسى للأزياء وناي آرت كافيه التي تكفل صاحب مشروعها الثقافي الفنان أنس اسماعيل بالتصوير الضوئي للحفل كاملاً, وسنقوم بنشر بعض من صوره المتميزة في مقال منفصل يحكي فيه الفنان أنس عن تجربته مع التصوير الضوئي بشكل خال والثقافة والفن بشكل عام.
كلمتنا الأخيرة ستكون من شقين أولهما لمن غابوا نقول : خسرناكم وما خسرنا الحفل, وثانيهما : شكراً لكل من ساهم في هذا الحفل , للصغار قبل الكبار, لمن كانوا في الكواليس قبل من كانوا على الخشبة, شكراً لكم جميعا, ما رأيناه في هذا الحفل كان فناً راقيا بكل ما يحمله الرقي من معاني, أخيراً شكر خاص لمن تعب لعشر سنوات ببناء هذه المدرسة, لمن أسس وأحضر هذا الفن الراقي إلى مدينتنا, لمن أبدع على مدى السنين, شكراً عمار حنا, لن نتركك تترك مدينتنا بل نفكر أن نعطيك الجنسية الفخرية فيها ليستمر الفرح.. وإلى حفل رائع وجميل آخر ليعذرني من لم أذكره في مقالي فكلكم نجوم ولاحاجة بكم لي لتثبتوا نجوميتكم.
جدير بالذكر أن نجوم الحفل احتفلوا بحفلهم الجميل بسهرة حلوة مع بوفيه مفتوح استضافه فندق السمان أكملوا فيه ابداعاتهم وهنأوا أنفسهم - وهنأناهم - بالنجاح الجميل.
فؤاد حكيم
LattakiaNews
تعتذر إدارة الموقع عن تلقي المزيد من التعليقات حول هذا المقال وذلك فقط لكونه نال ما يكفيه من التعليقات على كافة الصعد.. مع شكر الموقع لكل من اهتم وأضاف تعليقه.
أضف إلى:
del.icio.us |
Digg
del.icio.us |
Digg
أرسل إلى صديق
نسخة للطباعة
نسخة نصية كاملة قيم هذا المقال
التعليقات (86 تعليقات سابقة):
منشكرك من كل قلبنا على تعبك معنا...على وجودك معنا...على نورك اللي أضاف سحر خاص ع نور طلاب المدرسة
كلامك من قلبك...ومن قلبنا منحييك
عمو أبو حازم...تسلم ايديك
ونحن لا يكتمل عملنا الا بوجودكم معنا.....
من قلبي محبة لكل من ساعدنا ودعمنا هذا العام واسفي على من لم يقدر قيمة الحفل السنوي للمدرسة
شكرا استاذ فؤاد على الجنسية الفخرية التي اعتز بأني حصلت عليها منذ ولادتي لكن ربي يعطيني الصحة والقوة لاستطيع ان اكمل ما بدأت به في اللاذقية فقد مضى 10 سنوات اعتقد انها كانت مرحلة مهمة بحياتي لكن لكل حكاية بداية وايضا نهاية وانا اشعر ان النهاية باتت قريبة واتمنى من قلبي لكل من سياتي من بعدي كل التوفيق واعتقد انني فعلت كل ما استطيع وما هو افضل ليتمكن طلابي من الاستمرار من بعدي
:-(((
تعليق المحرر: نعم يا استاذ عمار .. لكل شيء نهاية .. ولكن نهايتك ستكون على يدي ان تركت اللاذقية .. وقد أعذر من أنذر ..ولكل من يريد الاشتراك معي في نهاية عمار اذا ترك اللاذقية.. تسجيل اسمه على صفحات هذا الموقع
إنا نصدر الرايات بيضا ونوردها حمرا قد روينا
والقصد هنا ليس التهديد ...وإنما الوعد الدائم بتفوقنا على أقراننا ونصرتنا لأستاذنا الذي كان له الفضل في مسلكنا هذا الدرب وله اليد البيضاء علينا في وصولنا هذه المرتبة التي و بحمد الله شهد بعلوها القاصي والداني والند قبل صاحب الود.
و أظن كلام أستاذنا العزيز إلا دلالا ممن يعرف حق المعرفة مكانته في قلوبنا ومعزته واحترامه لدينا .
((فؤاد حكيم)) الذي لا يسعنا ذكر جهوده الكثيرة والمتجددة لمدرستنا.
الجندي المجهول ((هالة عمقية)) التي كانت لي قبل أن تكون لكل فرد من أفراد مدرستناصديقة وأختا و ناصحا ومرشدا وأخيرا بارتنراً.
الجندي المعروف (( عمار حنا )) الذي ضحى بصحته و نفسيته ووقته واستطاع تحت أحلك الظروف أن يخرج عرضنا الراقص بأبهى حلة .
و أزين كلامي بشكري ل*قصيدة الفرح المستمرة* و *الزركش الدمشقي* كما أصفها
ياسمينتي العبقة على كل شيء دون تخصيص .
وأهدي محبتي واحترامي وتقديري إلى كل من
عمار ج , باسل , أحمد , إيهاب , ألفريد
دينا, ميري , شروق , ندى , هيفا , رنا وكل فتيات الباليه الذين قدمو الأضاحي والقرابين لآلهة الرقص في هذا العرض فكانت محرقة لا تضاهى جمالا وبهاءاً.
و شكرا عهالحفلة الحلوة
عنجد كنتوا كلكون بتعقدوا ,
ولنا الفخر انو نحنا طلاب لأستاذ لموهوب عمار حنا ,
بتمنى انو لسنة لجاية يكون قلي مشاركة معكون عل نفس لمسرح.
كل العادة اي شي بتكتبو بيطلع شعر
ونحنا كلنا مع استاذنا لو راح عل المريخ رح نروح معو
الرقصات كانت متشابهة وما فيها ابداع والراقصين أغلبن متوترين ومتشنجين وهالشي بين كتير منيح
ما كان في احتراف بالرقص .. كنا كأنو عم نحضر شباب هواة عم يتدربو على حفلة
منتمنى المرات الجاية يكون الأداء افضل من هيك لإنو نحن بيهمنا الموضوع ومنجي لنشوف شي مرتب و منشجع دائماً هالفعاليات
تعليق المحرر : انتبهت الى امر غريب : كل من يريد ان ينتقد يغفل اسمه او يترك اسمه مجهولاً .. وكل من يمتدح يكتب اسمه صريحا .. لا اعرف ما السر وراء هذا المرض.. لعله مرض اجتماعي منتشر على كل الصعد .. عجبي
أكتر شي حبيتو بحفلة السنة هو الحس التمثيلي اللي دخل بقوة عالرقصات (رامي و ياسمين) وهاد الشي عطا الرقص بعد أعمق بتمنى أنو كل الراقصين ينتبهوا على هالشي
وكمان لاحظت دخول وجوه جديدة بتستحق كل الاحترام متل دينا اللي شاركت المدرب برقصتين على الرغم من بساطتن بس بين أنو في وراهن حس مبدع وابتسامة بتدخل عل قلب
وعمار ج اللي برز السنة بقوة واضحة وشريكته هيفا بدي قلا كنت متل الفراشة عنجد
يمكن عم يولد عندك جيل جديد يا أستاذ عمار شفت هدول البراعم اللي بتبشر بالخير بتستحق منك شوية قوة وأمل لحتى تستمر المدرسة وشكرا
تعليق المحرر: والله يا " متابع داااااائم" لو كنت أعرفك لأوكلت إليك أمر كتابة المقال عن هذا الحفل .. فقد حللته أحسن وأدق مني .. وجعلتني أحس أنني .. الأحسن : إن لم يكن لديك مانع راسلني أو راسليني على :
info@lattakianews.com
تعليق المحرر : مرحبا بك وبحماسك للرقص .. تستطيع الاتصال بالمدرب عمار حنا على الرقم
0933638824
ومرحبا بك على صفحات موقعنا
لإنو كمان بمجتمعنا المريض مننطر الكل يزقفلنا ويجاملنا وما منطيق نسمع رأي صريح
تعليق المحرر: لم نطلب منكم التصفيق أبداً .. ونقدكم كان مميزا مما يدل على علاقتكم المباشرة بهذا الفن .. فقط سجلنا استغرابنا لعدم ذكر الاسم , وهذا يدل على عدم الثقة بالنفس بإبداء نقدكم الايجابي مع الاسم الصريح ,مع تأكيدنا على عدم الارتباط بدون شك ما بين الاسم والنقد, مرحبا بكم وبانتقاداتكم التي لم نلمح لها حتى.. فلم كان جوابكم الحاد هذا ؟؟؟علما بأننا لم نجد اية استفسارات لنجيب عنها كما ذكرتم
بنورو حفلتنا بأحلا الرقصات
وبشكر الاستاذ فؤاد على هذا المقال الرائع
وطبعا شريكي في الرقص عمار ج يلي دعمني ووثق بقدرتي بالرقص لأول مرة عالمسرح
ونحناسبب استمرارنا كل السنوات الماضية كان لأن الناس والمجتمع والمسؤلين ....باللاذقية كانوا يهتمو لأمر المدرسة يلي عم تعلم ابناء اللاذقية هالفن وتخرج من مدرستنا كوادر كتيرة حتى فتحو مدارس اخرى باللاذقية وضواحيهاوهاد الشي غير موجود بأي محافظة أخرى غير الشام يعنى مافي هيك شي بحمص او حلب او غيرها ورغم انو الكل عم بقول انو الفضل لمدرسة الرقص الأولى بس ما حدا عم يدعمنا نهائيا ولا بأي شكل من الأشكال بالعكس الدعم عم بكون لغيرنا وبدون مبرر ومو بس هيك عم بحطو علينا عقوبات مادية غريبة عجيبة هاد بدل ما يشجعو الفن وهالمدرسة اذا مجتمع اللاذقية ككل مو مقدر قيمة هالمدرسة وقيمة استمرايتها ليش انا بدي ضل اتعزب وكلو عالفاضي انا اذا مافي تقدير لعملي ومافي مردود مادي بخليني عيش حياة كريمة ومافي دعم من المؤسسات الرسمية (نقابة فنانين - مديرية المسارح- وزارة الثقافة وغيرها....) ليش لازم تم بهالمحافظة انا اجاني كتير عروض مغرية بمحافظات اقرب بس ما كنت روح لأني بحب طلابي كتير كتير كتير بس بتفاجئ انو يلي كنت حاطت فيهون الثقة طلع ما بهمون غير مصلحتون الشخصية وانا ما بهمون لا من قريب ولا من بعيد وطبعا هاد الحكي مو جديد من زمان موجودين هدول العالم ومن زمان تخلو عني وعن المدرسة بس وقتها كنت لساتني متحمس للفكرة فما تاثرت وكملت بس هلاء انا تعبت وماعدت قادر على تحمل الصدمات بدي عيش حياتي بسلام بعيد عن الظن والشك والاتهامات والحسد و.....
وطبعا حكي الشباب والصبايا عراسي من فوق وانا بقدر اهتمامهم وحبهم واذا في شي مخليني بالوقت الحاضر مستمر هو هالبراعم يلي عم تتفتح عندي
وبدي قول لكل يلي تركونا من سنين وليلي رجعو أو ما رجعو انا شعوري تجاهكون متل شعوري تجاه اي طالب موجود بالمدرسة وما رح يتغير انا حبيت كل انسان دخل لمدرستي وعطيتو كلشي بعرفو وما كنت بخيل ابدا ياريت لو كل هالعالم تقدر
أنا عنجد ما بالغت بس كنت عم حلل تحليل نقدي حيادي و إذا كان متل ما عم يقول الأستاذ عمار أنو هاد كلو من دون دعم مادي أو مساعدات مادية فعنجد برااافو هاد بيدل على الفن اللي جواتكن واللي قادر يطلع كل شي حلو من دون أي مؤثرات مساعدة وناطرين منكن السنة الجاية حفلة تكسر الدني
وبدي ضم صوتي لعمار جعفر : أستاذ عمار وراك وراك والزمن طويل لا تحاول تهرب من عنا لأنو رح نلحقك
شكرا ألك يا "متابع داااائم" بس دخول وجوه جديدة ما بيلغي أبدا الوجوه القديمة أو بالأحرى الأصيلة اللي نحنا منعتبرا أعمدة للمدرسة وما منسمح أنو تزعزع
بس مع كل الظروف الصعبة منوعدكن بحفلة قوية كتيييير السنة الجاية
تعليق المحرر: شكرا لك عزيزي منذر .. وأنت أحد الذين تعبوا في هذا الحفل الجميل .. ناهيك عن تشوقك للوقوف على المسرح ومشاركة أصدقائك فرحهم .. شكرا لك واعذرني لعدم شكرك في المقال .. وترجعلنا بالسلامة
بعدين خلص انت صرت محسوب علينا ومامنخليك تتركنا لو شو ماصار والاستاذ فؤاد قلك انو خلص عطيناك الجنسية ومافي مجال للتراجع
ومنحبك اي منحبك ومامنستغني عنك لا كأستاذنا ولا ك رفيقنا ولا ك اخونا
أيامنا معك مابتنتسى
وان شاالله عن قريب!!!!!!
كلكون حلوييييييييييييييييين وبتاخدوا العقل.أمووووووووووه
وشكرا للأستاذ عمار عهالمدرسة الرائعة وأنا بهنيك كتير كتير بطلابك اللي عنجد بينرفغ فيهن الراس....خصوصا الدكتور رامي متل ما قلت عنو
لأنو عنجد المواهب اللي بيمتلكها نادرة يعني عدا عن قوة الأداء و غرابة التصاميم اللي بينفرد فيها بيتمتع بملامح تمثيلية رائعة بتتغير من رقصة للتانية من الحزن والخوف بأول رقصة لتعابير الأعمى وبعدها الفرح والجنون ...يا ريت باقي الطلاب يتعلمو منو ...
أما ياسمين وهيفا فكانو عنجد نجوم بتضوي الحفلة بالاحساس والقوة والتناغم مع الموسيقى والانسجام الرائع مع البارتنر...
وكمان دينا خامة راقصة مبدعة يعني اللينة اللي بتمتلكها والابتسامة اللطيفة والوجه السموح كلها صفات رائعة ما ناقصها غير شوية شغل على ستايل الجسم وبتطلع فلجة...
عنجد شكرا كتير لمدرسة الرقص الأولى (الأصل مو التقليد ) على هالشغل الرائع
تعليق المحرر: كتابة الاسم الصريح عند النقد هو شجاعة أدبية لا نظنك تتمتع بها , أما عن النقد فكلنا نتقبله ونستفيد منه لتطوير أنفسناطالما كان موضوعيا,و عن مشاهدتنا لحفلات " برا" كما ذكرت فقد شاهدنا الكثير ولكنك لم تذكر امكاناتهم وامكانات هذه المدرسة التي تعملقت بذاتها دون أي مساعدة من اي طرف كان ,مرحبا بك على صفحات موقعنا
انت حطيت ايدك عالوجع فعلا المدرسة بحاجة للدعم المادي والمعنوي واللوجستي من كل القائمين عموضوع الفن بهالبلد ونحنا وخاصة انا رح يخلص عمري وانا عم صيح ونادي لحد ما ضل عندي قوة لحتى شي حدا بيفهم يلتكش فينا وفعلا اي فرقة رقص برا ابسط مننا بكتير بتلقى دعم شي بخوف واي راقص بيعمل عمل فني بكون جدا سخيف وتافه بتلافيهون نزلو من تحت الله بشبر ونحنا هون عم ........ كل يوم لحتى نقدم حفلة سنوية (مرة بالسنة)وآخر شي ما حدا عاجبو ولاحدا بقدر
عكل حال انا تعودت وحاسس اني قربت استسلم شو بدي اعمل يلي قبلي ما كان احسن الله يرحم ابوخليل القباني بزمناتون حرقولو مسرحو وقلعو من كل سوريا.......إلخ
الحكديث أني ومن زمان بتابع الموقع تقريباً يومياً وعلى حد علمي الموقع أخباري....
مننشر خبر..منحط تعليق...بس تعليق المحرر ليش؟؟؟؟
اذا كنت صحفي ومحرر لموقع صحفي فمن حقك(على حد علمي) أنك تنشر التعليق أو ما تنشروا حسب"سياسة الموقع" كما قلت سابقاً...
بس الي ملاحظو أنو حضرتك عم تعلق كتير على ملاحظات المتابعين...وغالباً عم نحسك متحيز للطرف الي عم يحكي عنو المقال؟؟؟
برأيي المتواضع:
خلي صاحب العلاقة يرد بتعليق منو ..
وخليكم محايدين ما دام التعليق قابل للنشر وبيتوافق مع سياسة الموقع
بيجوز تكون هي وجهة نظري..بس فكروا معي شوي بكلامي!!!
وبالنهاية......اختلاف الرأي لا يفسد في الود قضية.
وفقكم الله.
تعليق المحرر: ومن قال لك أن تعليق المحرر ملزم لأي من القراء ؟؟ هو رأي مثل كل الآراء .. وأنت حر ان تذكر اسمك أو لا تذكره , ولكن من المتفق عليه أن الشجاعة الأدبية تلزم المنتقد بذكر اسمه حتى لا يبدو من المتحاملين على ما كتب لسبب في نفسه, اما من ناحية تعليقاتي الشخصية - وهي رأيي الشخصي كما ذكرت - فأعلن دون مواربة انحيازي الكامل لمن كتبت عنهم بدءاً من المدرب والفنان عمار وحتى أصغر فراشة كانت تشارك في الحفل وإلى كل من كان في الكواليس جنديا مجهولا أو معلوماً مرحبا بمتابعتك الدائمة للموقع .. وليس هناك أي ود قابل للفساد في أي قضية ..
مادام تعليقك يعبر عن رأيك الشخصي فلما لا يكون تعليق منفصل باسمك الشخصي؟؟؟؟؟؟؟؟
وبذلك لا تعتبر صحفي بل متابع يبدي رأيه؟
مش فكرة واردة؟؟
تعليق المحرر: من الواضح أن اسمي هو فؤاد حكيم .. حتى أنه مكتوب باللون الأحمر أسفل المقال .. تفحصه لتصدقنا .. مستعد للقَسَم الشرعي ان لم تصدقني.. وأنا لا أعتبر نفسي صحفيا .. بل مدير لموقع لاذقاني غير ربحي يهدف الى نقل اخبار اللاذقية لا أكثر
كل ما يكتب كتعليق للمحرر نتبناه كإدارة موقع وكمحررين .. ولا نتهرب تحت اسم " المعلق" ابدا
انا طرحت فكرةومني متهرب بكلمة "المعلق" الي على ما يبدو خرجنا فيها عن فحوى الموضوع ...
اذا كنت متشدد ومنحاز لعمار يا خي حقك ما حدا قلك لأ....بس خلي الناس الي نقدت ترتاح بنقدها لأنو اذا تمِّينا عم نجامل ونقول حلو وجميل ورائع ما منعرف الجوانب الي فاتتنا ونحاول نتلافاها ونطورها....صح ولا غلط....
قالوا بالامتال: فراح للي بيبكيك ما تفرح........
المهم كلامي أنو ما تسكرولنا الباب قدام الي بينتقد على الاقل لنعرف الجوانب الضعيفة( بغض النظر عن الامكانات والتمويل وووووو) هي هية فكرتي.....
بطلولنا الاسلوب الشرقي المتحيز لنحاول نتطور شوي.....
مرة تانية...صباح الخير للكل...موفقين...
وللحديث غالباً بقية.
قلتلك أني زبون دايم وبالتالي باعرف انكن منكن موقع ربحي بس ما هادا هوة موضوعنا موضوعنا أنو يا خي أنا اقترحت أنو تعليق المحرر بدل ما تحطوهنة تحت التعليقات خليه يكون مستقل بذاتو يعني متل الي عم اكتبو هلأ ويكون باسم حضرتك يا سيد فؤاد........
وبس..زولاني عم قاتل ولا عم ضارب ولا عم شكك بانك فؤاد توفيق حكيم متل ما كتبت سابقاً, بس كلامي حتى ما يفكروا العالم انك متحامل عليهن ومتشدد
تعليق المحرر : والله أتعبتني يا أخي .. أنا لا أضع تعليقي بخانة منفصلة لأن هناك عدّاد للتعليقات .. لذلك, وحرصا على مصداقية الموقع والعدادات لا أستطيع أن أضع تعليقات منفصلة حتى لاتؤخذ بالحسبان.
من ناحية أخرى : من أين أتاك الاسم "فؤاد توفيق حكيم " فأنا كتبت فؤاد حكيم فقط !!!!عجبي
يعني ماشرط السيد عادل يكتب عادل فؤاد حكيم لأنو نذكر من قبل هالشي بالتعليقات واعذرني لعدم ذكر المصدر بتفاصيلو...
المهم الله يعطيكن العافة على مجهودكن الغير ربحي ويا ريت تخبرونى شو اخبار الاسماء الي غابت صرلها فترة عنا متل لانا صفية وباسم مخلص وعمر مفتي وووو......(طبعاً مع حفظ الالقاب)؟؟
والله يوفكن وتذكرونا بالبلد الحلوة.
تعليق المحرر : الله يعافيك أخي الكريم .. وشكرا منا وممن ذكرتهم .. نحن بانتظار كتاباتهم مثلك .. للاسف بعضهم قليل المروة والبعض الآخر مشغول بامتحانات وتخرج .. الخ
تذكرنا دايما بالخير .. وبلدنا لا تنسى ابنائها
وأنت من أهل هذا الموقع اللاذقي ..
دعنا نسمع منك شيئا ما لننشره لك باسمك الجميل : زبون دااااااايم للموقع
ملاحظة أنا قارئة و مهتمة بموضوع الرقص وليست لي أية علاقة بالموقع ولا أتبنى أية مواقف ولكني شعرت أن الموضوع الذي تتطرحه لايخص المقال من قريب أو من بعيد
بدي أسألك هاد الانسجام بينك و بين شريكتك ياسمين قديش أخد منكن وقت تدريب لحتى وصلتو لهل مرحلة من التآلف والتناغم ؟ وقديش مهم أنو يكون في انسجام بين الشريكين بالرقص وكيف ممكن الواحد يوصل للدرجة اللي وصلتولا؟
بتعرفي ما نتبهت اني طلعت لبرات الموضوع..
بالله فتحيلي الباب لأدخل مرة تانية!!!!!!!!
يا آنستي انا ما كان تعليقي عالموضوع الي ما بيهمني لا من قريب ولا من بعيدلأني متغرب برات البلد وما تابهت الحفل وبالتالي ما فيني احكم عليه بس تعليقي على حالة وهية تعليق المحرر او تعفيب المحرر واعذريمي اذا زعجتك بتعليقاتي ولا تخشي ان يكون هدفي هو التسلية لأنه ليس كذلك.............
واذا كنتي خايفة ما تضيعي وقتك الثمين على تعليقاتي ببساطة ما تقريعا!!!!!
شكرا
انا بتمنى تجي شي يوم عبلدك سوريا وتحضرنا بشي حفلة نحنا عاملينا واذا كان فينك تساعدنا ماديا او عن طريق علاقاتك (واسطة) بكون يكتر خيرك واذا ما بتقدر بتخيل بعد ما تشوف الحفلة رح بتحط تعليقات فيها تشجيع ونقد بناء مبني على المشاهدة
عمار حنا
تعليق المحرر: أعلنت في تعليق سابق أنني متحيز لهذه المدرسة لأني مقتنع بما تقدمه على اسس مدروسة وقد اعطينا الجهات الأخرى فرصتها في موقعنا وليكن معروفا أنني أحضر كل العروض التي تجري في اللاذقية وأدفع ثمن بطاقتي - كوني لم أدعَ إليها كصحفي ولا مرة واحدة لأحكي عنها .. ولم أجد خلال حضوري أي شيء جديد أو مميز للغاية - اللهم إلا بعض اللمحات الفردية الخاصة - وانا والأخ صاحب التعليق نعرف عما نتكلم ..أليس كذلك؟؟
بس الصدارة لا تعني دوماً الجودة..
انا تعليقي كان موجه للموقع مو لحضرتك...
اي نعم الرقص فن حلو...بس برأيي الشخصي على الاقل( مع احترامي لكل الآراء) ما بدو كل التطبيل والتزمير..
اما بالنسبة لمشاهدة الحفل فشرف كبير الي كونو في اعداد كبيرة من المؤمنين بمواهبهن عم يحاولو يبينوا للناس....
يعني منشان المواهب مو منشان الي بدهن دعاية(طبعاً بتمنى ما انفهم علط) وبتمنى تكون هالدعاية لغاية فنية مو لغاية مالية......
وبالنهاية الرقص "هواية" ومين مناما بيرقص؟؟؟؟؟
بحب قول لشريكتي((هيفا)) يلي كانت متل اخت وصديقة عزيزة بالنسبة الي ويلي كانت مساندة الي ب كلشي ويلي تعبت كتير لتكون مساندة قوية للحفل ويلي طلعت معي على الشام لتشارك ببطولة العرب رغم وجود امتحانات وتحملت ضغط تدريب والارهاق....انتي صرتي بالنسبة الي اخت وصديقة قبل لتصيري شريكة وانو انتي الشريكة المثالية بالنسبة لأي شخص بيرقص ورح تكوني من افضل راقصات الصالونات بس سوريا ان كنتي معي او بدوني والمستقبل كلو الك .....
وبحب قول ل والدة هيفا
انا بشكرك على كل الدعم يلي قدمتي النا بالفترة المضت...استقبلتينا عندك وعاملتينا متل ولادك وتحملتي سقالتنا وعياطنا بحب قلك انو انتي كنتي بالنسبة الي متل الام بشكرك من قلبي .....
مع كل احترامي وحبي عمار جعفر
وكمان انت صرت بالنسبة الي أخ عزيز
وبشكرك كتير عكل شي اعملتلي ياه واتحملتو مني
وأمي بتقلك انو بتعزك كتير وعاملتك متل ابنها لأنك شب محترم وبيتمتع بطيبة القلب والعفوية ومحل ثقة
ميرسي مرة تانية عكل شي
هيفا
وشي طبيعي اني اسعى وراء المادة بالنهاية الفنان هو انسان من حقو يعيش حياة كريمة وأكتر ويكوون مستقبله وحتى اذا صار من اصحاب الأموال هاد حقه لان هيك انسان لما بصير معه مصاري بروح بيفتح مشاريع ثقافية وفنية تدعم المجتمع اكيد مارح يصر تاجر مخدرات مثلا .........
سمر(مع حفظ الالقاب طبعا) بظن اني كتبت سابقا بانو الموضوع ما بيعنيني لا من قريب ولا من بعيد وانو مداخلتي كانت للمحرر, يعني سواء كان الموضوع عن الرقص او البطيخ او غيرو وغيراتو وكلامي كان للاستاذ فؤاد الله يعطيه العافةهوة والكادر الي معو,بس حضرتك دخلتيني بالموضوع ما بعرف ليش ورجع عمار حنا(كمان مع حفظ الالقاب) ودخلني بالموضوع مع العلم اني ذكرت انو مافيني احكم على شي ماشفتو واني ما حضرت الحفل بس ما بعرف ليش مصرين "تحشروني" بالموضوع حشر؟
ملاحظة صغيرة: بعمري لا انتميت لأي مدرسة رقص واصلا ما بعرف انو في عنا مدارس رقص للسنة الماضية عن طريق هالموقع الحلو لأني متغرب من سنين برات البلد ببساطة.
بس في براسي سؤال من باب الفضول:
المسرح بيطرح حالة اجتماعية كما التلفزيون والسينما وبالتالي بيكون فيه اسقاطات على الواقع وبيكون الو هدف بس سؤالي(بما انو صارت وصارت) للسيد عمار :
التانغو والسالسا والرومبا والفالس والروك و ................
شو ممكن تقدم للمجتمع وتفيدو؟؟؟؟؟؟؟
طبعاً بغض النظر عن التسلية وتغيير ال(مود) وتفريغ الشحنات...
يعني كمثال: فلم الحدود منعرف رسالتو بس الرقصات الي ذكرتها شو بتقدم؟؟؟؟
شكراً
تعليق المحرر: لن أجيب هنا عما سألته , وسأترك الأمر لمن وجهت له سؤالك , ولكني أعتقد بأن عددا من المواضيع المنشورة في هذا الموقع قد أجلب عن أسئلتك , وأنت تقول أنك زبون دائم للموقع , "طبعا مع حفظ الألقاب"
بس عنجد السنة كانتت الحفلة بجماعي الأطفال والكبار أقل من مستوى السنة الماضية .
يعني ما حدا طلع خطو البياني غير رامي وياسمين اللي استخدموا أفكار بعيدة كتير عن عن هاد الزمن عدا عن الاحساس اللي تميزو فيه من عدة سنين والانسجام والرقص الاحترافي ..
وما ننسى عمار وهيفا بشكل طبيعي طلع خطو البياني لعمار بسبب تعدد الرقصات و الانسجام الواضح مع شريكتو عكس الوضع السنة الماضية ...
اتلله يوفقكن و ترفعو راس اللادقية بش محفل دولي..
حضرتك مادام عم تعطي هالفن الحلو ...ليش عم تفرط بالطاقات اللي عندك يعني كل ما عم يوصل عندك حدا من الطلاب لمستوى عالي ما منلاقيه غير برا المدرسة؟
متل (( نورا , بتول , كنانة , سامي ))
خصوصا كنانة شريكتك
سامي اللي كان أحد نجوم العروض الماضية...
و شو ما كان جوابك بتمنى عليك ما تفرط بآخر وردة عندك و آخر القديمين واللي هوي رامي لأنو إذا راح ما بتوقع بعشر سنين بتعوضو ....وهاد موحكيي هاد رأي كل العالم..
وشكرا لتعاونكم و شكرا لهذا المنبر الجليل
أنا بشكر الأستاذ عمار حنا على كل الجهود اللي عملها كرمال ولادنا وكرمال هالمدينة الحلوة ..
بس أنا عندي ملاحظة عالمتابعين للمقال إنو من بين كل هالردود والتعليقات ...ما شفت ولا تعليق حلو بحق بنات الباليه ...يعني معقولة ما كان في ولا بنت بتستاهل التشجيع والمديح عنجد إذا ضل الواحد يشتغل وما حدا يدعمو ولا يقلو برافو بعمرو ما بيتقدم...
شكرا
تعليق المحرر : فراشات الباليه لن يستطيع أي تعليق إيفائهم حقهم يا سيدتي .. حلقوا عاليا في الحفل .. لهم ولأهاليهم كل الشكر والتقدير
بشكرو لهالداء الرائع اللي استمتعت فيه كتير و بتمنى شوف اكتر من رقصاتو لانو عنجد عنجد انو موهوب و الموهبة بدمو
إلى المحرر إذا كان قصدك مدارس الرقص التانية فطبعا انا بقصدا بس من دون تحيز لاي وحدة منن
تعليق المحرر: المقال لا يتحمل صور أكثر مما نشر وليس لدينا أية اعتبارات شخصية خاصة أننا نقدر ونحترم كل من اشترك في هذا الحفل.
*** أين الثرا من الثريا ****
لأنو ما حدا بيطلعو مع المدرسة الأولى...
يعني إذا مدارس تانية جابت كوبل أرجنتيني وقعد هالككوبل يرقص بمستوى عالي و رجعو بعدو الطلاب يقلدوه يشكل أعمى بيكونو مبدعين !!!!!!!!؟؟
طب فيني إسألكن وين مستواكن بالسالسا والتشاتشا و الروك (( بدكن 100 سنة لتعملو متل روك رامي وياسمين )) و لا راقصات الباليه تبع مدرسة الأولى اللي مستواهن صار مصنف على مستوى سوريا كلها ...
عنجد عمار حنا go on بيضل جهد ابن البلد أحسن وأهم وأحلى من كل الجهود الأجنبية اللي عم تتقلد من دون ما تنفهم ...
تعليق المحرر : علامَ الأسف يا زبوننا الدائم؟؟ كله حديث بحديث .. مرحبا بك دائما معنا
الجواب : العلم ما بيتجزء نحنا ما فينا نعلم مجتمعنا بس العلوم يلي بتخصو نحنا بنكون عم نحصرو ضمن قوقعة من التعتيم الاعلامي نحنا بنطرح ثقافات الشعوب الأخرى يلي سابقتنا بتطوير علومها من شان نتعلم منهم كيف تم تطوير هالفنون ونرتقي بالفنون المحلية لنوصلها للعالمية بكل بساطة مافينا ننكر انو عظماء الموسيقا العربيةتعلموا من الحان بيتهوفن وشتراوس ومودزار وتشاكوفسكي .....وابدعو اجمل الألحان يلي بنعتبرها تراس الأمة العربية وهلاء بالمعهد العالي للفنون المسرحية عم تدرس كل انواع الفنون المسرحية والموسيقية الغربية للطلاب وانا هيك تعلمت وعم حاول اطرح الفنون الغربية واللاتينة بجتمعنا وعم حاول امزج بينها وبين الثقافة المحليةوبخيل هي فائدة لمجتمعنا ما حدا سبقني عليها
وشكرا عسؤالك واذا في اي استفسار آخر انا جاهز للرد وشكرا
كل واحد فيهون عندو ظروفه يلي منعتو من المشاركة بالحفلة او الاستمرار كطالب بالمدرسة وانا عندي شروطي لحتى ايا حدا يستمر معي كطالب او كمساعد مدرب واذا ما عجبتهم شروطي ما فينهوم يستمروا لان السفينة لازم يقودها ربان واحد واذا بدي احكي كل واحد ليش بطل من عندي او ما شارك بدنا للصبح ما بنخلص وهاد شي بصير بكل مدارس الرقص وانا اكيد ما بتمنى اخصر اي حدا انا بحب طلابي بس هنة لازم يحترموني ويلتزمو بشروطي ويكونو معي مو عليي وانا اكيد ما قصرت مع حدا بس دائما ما بقدروا الشي يلي انا عم بعملو منشانهم
وبخصوص كنانة هي اختي وصديقتي وطالبتي قبل ما تكون شريكتي وهي عندا ظروفها الصحية وغير الصحية دفعتها لعدم المشاركة وانشاء الله بالمستقبل بتكون تخطت هالظروف وبتشارك معنا وانا ابداًما بستغني عنها ولاعن ايا طالب من طلابي بس احياناً الظروف بتكون اقوى والمصلحة الشخصية عند البعض عم بتكون اهم من المدرسة ومن المدرب
بتمنى كل التوفيق لكل يلي فضل بنفصل عنا وبتنى يلاقي دائماً طريقة للتواصل معنا بالنهاية شئنا ام أبينا نحنا فريق واحد
وشكراً
وجعبالي خبرك يا الياس ويا كل اللي عم تسألو ...إنو الأستاذ عمار ما قال كلشي بقلبو ...
.................................................................................................................................................................................................و باقي الحكايا قلولي شرط إنو يوافق مدير الموقع فؤاد حكيم
تعليق المحرر: يشترط بأي شاهد أن يقسم بأن يقول الحق .. كل الحق ولا شيء إلا الحق .. وشهادتكم غير مقبولة في أي محفل كونها نتجت عن غير ذي صفة, وغير ذي علم .. بمعنى :غير معلوم الهوية .. فإن كنت شاهداً على العصر كما ادعيت - فعليك بالإفصاح عن هويتك حتى تقبل شهادتكَ ..أو ما ادعيته بمعنى أدق.. أما رمي الكلام على عواهنه .. فهو ضد سياسات موقعنا .. وأنا هنا لا أطلب معرفتكم .. فقط أؤكد على إحدى سياساتنا الثابتة :لا نشر لأي تعليق يؤذي مشاعر أي كان دون دلائل. نقطة انتهى
مدير الموقع فؤاد حكيم يقول لك أنه استبدل ما كتب دون دليل بنقاط .. قد تستطيع أن تعبر عن الحقيقة أكثر مما كتبتم
و لأا أظنك تعرف عن المدررسة كما يعرف أبناؤها عنها....
شكرا
تعليق المحرر : بل أعرف أكثر مما تظنون
والحمدالله مرقت بأقل الخسائر ما عدا غيبتي عن بطولة العرب بس مو كتير مشكلة لأنو عمار جعفر ناب عني وبيضلي وشي ووش اللادقية وبدي قلو ألف مبروك إلك ولهيفا عالانجاز الكبير اللي حققتوه يعني هي أول مشاركة إلكن ببطولة على هالمستوى ولقب الخامس علعرب مو شغلة قليلة من أول مرة ...
كمان بدي أشكر كل الناس اللطيفين والمهتمين بنشاطات مدرستنا إنو الحكي اللي شفتو هون عنجد فرحني كتير وحسسني أهمية الشي اللي عم اشتغلو .... وأنا صرت متمسك أكتر وأكتر بهالمدرسة .
تعليق المحرر : الموقع موقعك دكتور بتعلق ايمتى ما بدك .. وبتتأخر على قد مابدك .. الموهوبين اللي متلك ومتل عمار جعفر ومتل ياسمينتنا الباريسية وهيفاء الموهوبة .. يحق لهم غير ما يحق لغيرهم مع محبتنا للجميع .. أوعكم - كلكم- تشكوا لحظة وحدة بأهمية اللي عم تعملوه
بدنا نوعد كل أهل اللادقية وكل طلاب المدرسة القديمين والجداد وكل أسرة المدرسة والداعمين للمدرسة إنو رح تشوفو السنة بآخر الصيف عمل ضخم جدا جدا ....رح يكون قنبلة الفن على مستوى سوريا ....وبمناسبة عيد ميلاد المدرسة العاشر ....و إعلان ولادة النظام العالمي الحديث في اللاذقية\.
تعليق المحرر : من ورايي ؟؟ بسيطة .. منتحاسب
ما بحبها هي استاذ فؤاد رح قول الأخ فؤاد,بتشكروا لأحتراموا كلمة أنا آسف الي ماصدرت عني ومرحبا فيك اخ فؤاد قبل ما تقلي مرحبا الي.
أما للأخ عمار فاسمحلي قلك انو هلأ بعد ما قريت تعليقك الاخير الموجه الي (ومن دون زعل) احترمتك لاني حسيتك احترمتني وجاوبت(مشكوراً) على سؤالي لانو تعليقك الاول حسيت فيه نوع من الاستهزاء ويمكن ظنيتني من (حزب اللا عمار حنا) بس مو هون موضوعنالأني اعبر عن ذاتي فقط ولم يكن موضوعي الحفل.
بس سؤالي:
ذكرت موتزارت وتشايكوفسكي ووووو وتأثر الموسيقى العربية فيهن( غالباً سرقة) ولنعتبر البداية مع الرحابنة وغيرهم وقلت بأنك تحاول(مشكوراً) المزج بين العربي والغربي وانك السباق بالموضوع!!!
طيب كركلا (كعائلة) وانانا كفرقة وغيرهن وغيراتهم ما مزجوا.؟؟؟؟
وشكراً جزيلا..
بالنسبة لكركلا واينانا فهنة فرق راقصة احترافية قدمت الفلولكلور الراقص السوري بطريقة ملاحم الباليه مسفيدين من الباليه الكلاسيكي والرقص الحديث ورقص الجاز والرقص المسرحي بس ما تطرقو لموضوع رقص الصالونات او الرقص اللاتيني بالاضافة لأنك اذا حبيت انك تتعلم عندهم الرقص فهم مابيقبلو غير الراقصين المحترفين اما نحنا مدرسة تفتح ابوابها لكل الناس من جميع المستويات الفكرية والجسدية..... وبنقدم للطلاب كل قدراتنا لحتى نعلمهم ويمكن يستطيعو انهم يوصلو لمرحلة محترفة بالمستقبل
وبالتالي اذا قدمو لفرقة متل انانا يمكن يقبلوهم يعني نحنا مرحلة تتدريسية وليست احتراف ولكن قد تؤدي للاحتراف
بس أنا بتمنى تعملو مرة تانية يوم مجاني بعد الحفلة المباعة مشان اللي بيحب هالفن وبيتابعو يقدر يجي ...
أنا 200 ل.س ما فيني جيب فيها زوجتي وأولادي لأنو بتكسرني ...
وكمان انسينا رهف فرنسيس يلي اجت من الشام لحتى ترقص معي وكنت بتمنى يطلعلي شي صورة معها بهالصفحة اذا كان بالامكان اضافة شي صورة يا سيدي الكريم
يعني ((عمتو أمل )) مو صحيح إنو نقارن دينا بكنانة يعني الوجه الطفولي لدينا والتعابير البسيطة اللي عندها مو متل خبرة كنانة ال8 سنين , عدا عن إنو ستايل دينا بدو كتير شغل لأنو الراقصين لازم يكون عندهن جسم نحيل ومتناسق.
ولسا ما حكينا عن باقي البنات اللي ما ممكن نقارن دينا فيهن واللي الجمهور عطاهن حقن وحضرتك شايفة التعليقات.
وكتير بشتاق لهديك الإيام الحلوة....
بس شو بدنا نسوي الشغل و الظروف الحياة مبعدتنا ...انشالله منلتقي قريبا ...أو بحضرلك شي عرض إذا عندك شي قريبا!!!
سلام
أستاذ فؤاد مشان مشروع آخر الصيف الصراحة نحنا عم نشتغل من وراك من زمان يعني هاد المشروع كان مطروح من السنة الماضية بيني ورامي و ياسمين بس كان بدنا أنو يطلع باحسن مستوى لذلك أجلناه للسنةاما عمار جعفر فهو عضو جديد بمشروعنا أهلا و سهلا فيه وحتى هيفا يا ريت اذا بتكون معنا بعد ما أثبتت حالا مع عمار و كان عنجد بديل رائع الي وانتظروني بعمل رح يكسر كل تخيلاتكن و يحطم كل المستويات الي تقدمت من قبل باللادقية و اخيرا يسمحلي اني ورجيكن منيح مين هي دينا
بس بدي انصحك يا دينا انك تبقي هيك واهم شي بنجاح الانسان هو التواضع لان بس الواحد عطا نفسه حجم اكبر منما بيستحق بيخصر وبخلي الناس تبطل تحبو وبيصفى برا المجموعة متل ما صار مع كتير ناس عنا بالمدرسة بس هاد ما يعني اننا حكمنا عليه بالاعدام انا دايما بعطي فرص بس بشرط كل واحد يتعلم من اخطاؤه وما يرجع يعيدها مرة تانية لان في قدرة على التحمل والمدرسة مكان لكل الطلاب القديمين والجدد ضمن مراعات شروط استمراية هالمدرسة
وحبي للكل بتمنى يوصل بصدق لكل اصدقائي وطلابي ورفقاتي بكل مكان
عمار حنا
وأنا معجبة بطريقة التعليم الحضارية-بما أني كنت طالبة سابقة-وبتمنى أني أرجع وبتمنى تضل هالمدرسة معلم من معالم محافظتي وبقول للأستاذ عمار إن بعد الصبر فرج إلا متلاقي الدعم المعنوي قبل المادي ولو أني متأكدةانو ما بدو تفتيش.
بس على كل بتستاهلو مع اني بتمنى انو ما يصير هاد الموقع باب لحوارات داخلية بتخص أهل المدرسة بس يعني خلوها بيناتكن ولا تورجوا الناس الا الوش الابيض الحلو أما المشاكل الداخلية فحلوها وراء الستار من دون ما تأثر على الشي الجميل اللي عم يتقدم
في شغلة لفتت انتباهي بالتعليقات اللي سبقت أنو الراقصة لازم يكون عندا جسم نحيل ومتناسق هاد الكلام صحيح بس خلينا نشوفا من جهة تانية يعني اللي عم يكون عندا جسم خلينا نقول كربوج (وأنا ما شفت بنت سمينة عالمسرح)عم تتحدى هالمشكلة و عم تطلع كل شي جميل جواتا عالرغم من كل شي والدليل أنو ظهرت أكتر من موهبة بهالمدرسة اللي صار عمرا عشر سنين -العمر كله انشالله- متل بتول سعد و دينا ما بعرف بس شو ما قلتو بتضل اكتر بنت لفتت انتباهي بالرقصات الجماعية هدول البنتين بإبداعن اللي وصل للكل وصّلوا رسالة أنو الرقص هو ظاهرة فرح و هي مو محصورة بمجموعة من الناس لاء هي للكل و مشان هيك نحنا لازم نشجعن و نبارك جهودن بدل ما نحبطن ونكسر معنوياتن
تعليق المحرر : سبق وأن كتب الأستاذ عمار حنا في آخر تعليقاته ما يلي : كلياتنا فريق واحد وكلياتنا بنتعاون لانجاح اي عمل بدنا نعملو لان بالنهاية النجاح النا جميعا.
وشي كتير حلو اللي عملتو ه
بس أنا بدي إبدي إعجابي الكبير بألماسة الحفلة وقطر الصباح (( ندى الورد المتفتح ))
ندى غريب الملاك اللي افتتحت الحفلة بأروع رقصة فالس مع شريكا عمار جعفر
معليش اعذرني استاذ فؤاد لتاخري بالرد ولكن كما يعلم الجمع باصابتي و بسبب العمل الجراحي لركبتي و الذي سببه وقوعي بالرقص و كما يعلم الاستاذ عمار حنا و الجميع انه بالرغم من اصابتي اكملت التدريب و كنت ادرب رفاقي . و هذا بسبب حبي و اهتمامي بهذه المدرسه و هذا ما يعرفه عني شريكي عمار حنا و مسؤوليتي تجاه هذه المدرسة . و شكرا جزيلا جزيلا اكل التعليقات الجميله بحقي و الذين يعرفون بحق ماذا قدمت انا وكل رفاقي القدامى لهذه المدرسة و اكيد لا يستطيع الجديد ان يلغي القديم مهما فعل . و اقول للجميع اكيد لن اتخلى عن الرقص و سوف اعود اقوى من الاول , عندما اتحسن انشاء الله . و الشكر الكبير لاستاذنا فؤاد حكيم و لزوجته الرقيقه ندى . و ارجو منه ان ينشر تعليقي .
تعليق المحرر: لأن عذرك كان مشروعاً .. وبعد قرار إيقلف التعليقات عن هذا المقال ننشر تعليق المبدعة كنانة موسى ونقول لها .. إن حرصنا ومحبتنا لهذه المدرسة لن يتوقف يوماً وانت وشريكك وصديقكِ عمار .. حريصون كل الحرص على نجاح هذه المدرسة مثلنا جميعا
تعليق المحرر:لا يا سيدي ماظبطت معك .. ولو كان للقيم عندك معنى كنت وضعت اسمك الحقيقي ولم تتستر وراء الحق
عد للمقال الذي تعلق عليه وسترى أن التعليقات على الموضوع قد أوقفت من فترة طويلة .. وهذا سبب عدم نشره الأساسي.
أضف تعليقك