ذكريات الطفولة
غريبة ذكريات الطفولة ... تعود إلينا بين وقت وآخر وكأننا عندما نتذكرها نعود صغارا... وأتعمد أحيانا أن أسال والدي أو والدتي عن بعض الأحداث الجميلة التي حصلت معهم ... فقط حتى أرى تلك النظرة في عيونهم فأحس بالطفل الذي بداخلهم (جربوا تعملو هيك مع الناس الي بتحبوهم وشوفو هيدي النظرة ما أحلاها) ... حتى أني أقلب بين صورهم القديمة وتنتابني أحاسيس غريبة ... كلنا كنا أطفالا وكلنا سنكبر يوما ما ...
من فترة قريبة لاحظت وجود شعرة بيضاء بشعري فأحزنني الأمر جدا ( لاحظتو الدقة... لأنني كل يوم بعدهم) ... وحطيت كل الحق على ستي هي اللي ورثتنا هيدي الوراثة ... وطبعا بلشت نق .... وزعلت كتير ولا أخفيكم أنني خفت وبدأت أحسب اليوم عمري24... والعام القادم 25 وبعد 10 سنين بس عشر سنين بيصير عمري35... يا ترى سعادتي بأي عمر سأجدها ؟ وياترى أنا كبرت ؟ ولما بدي أكبر كيف سأشعر بالسعادة وأنا كبيرة والمصيبة لما بدي صير ختيارة كلو كوم وإني صير متل هالختايرة الي بينقو طول الوقت وماعاجبهم شي وخاصة إنو نحنا عنا بالعيلة مجموعة من الختايرة الصعبي المراس من العيار الثقيل وإذا لعبت المورثات دورها ... على الدنيا السلام...
فقررت أن آخذ بعض التعهدات على نفسي .. المستوحاة من الناس الإيجابيين في حياتي ...
أولا: في ناس بتعيش على أمل إنها تلاقي السعادة بحياتها ... وناس هي الي بتصنعها ... سأعمل جهدي على أن أكون من الفئة الثانية
ثانيا : سأعمل على أن أعيش جمال كل مرحلة بحياتي على حدى سأتعلم من المرحلة السابقة وسأخطط للمرحلة القادمة حتى تكون أجمل...
ثالثا: سأجدد بعض العادات التي توقفت عنها من فترة ومنها اللعب .. نعم .. عم إلعب الطميمة والحجة وسابق (لهلأ بابا بيسبقني) وعم نط ع الحبلة وعم إلعب حجرة ورقة مقص (لوتعرفو أديش شاطرة فيها) ويويو ويوغي يو وجبت دفتر وعم إشتري علكة ولزق الصوروبقالي صورة وحدة وبربح ... ضروري حتى أحيي الطفل الصغير الذي بداخلي ... مين قال إنو الكبار ما لازم يلعبو أصلا اللعب ع كبر أحلى..
ثالثا: قررت إنو أعمل بعد الصداقات مع بعض الكبار بالسن الي بعيلتنا... وصار عندي قعدة أسبوعية مع وحدة من تاتاتي ( لاتستغربو عندي 3 تاتات قصة طويلة ) منتساير فيها سوا وبسمعلها ومنحكي ع العالم أما النم مع الختايرة حلو كتير وهون بدي أشكر الشخص الي علمني أعمل صداقة معها لأنو فادني كتير وبلكي أنا بوكرا لما بصير ختيارة بلاقيلي شي حدا يقعد يسايرني...
رابعا: الضحك ثم الضحك ثم الضحك... مسلسلات وأفلام كوميدي (ولما الواحد بيكون بجمعة بتصير أحلى) وعم إتعلم رواية النكت مع إني سيئة فيها كتير لأنو لاحظت إنولما عم أحكي نكتة ماحدا بيضحك غيري بس معلش...
خامسا: العمر هو خبرة وحكمة والشيب والتجاعيد هيدي علامات خارجية أما الي بالداخل فما بيزيد إلا حلاوة وجمال لهيك بعد عشر سنين بدي صير حلوة بس بعد عشرين سنة بدي صير بطير العقل...
سادسا: لما بدها تجيني رغبة إني قاتل زوجي وأ ولادي وبربر ع هادا ونم ع هاداك وبهدل هيديك ... رح ضل ساكتة وقول لحالي .. ما الحق عليهم إنتي الي نقيتيه من بين كل شباب الدنيا وخربتي الدنيا لتاخديه وإنتي اللي خلفتي هالخلفة وإنتي الي ربيتي هالترباية.. خليكي ساكتة أحسن... أما مرت أخوي وكنايني (من هلأ جاية ع بالي إعلق فيهم ) بس لاااااااا تذكرتي منيح عمتك وستك أكيد مابدك تصيري متلهم ...
ديري بالك... إنتي كبيرة وعقلك كبير... عيب
وبالنهاية مافيني إلا أشكر الشعرة البيضاء وخاصة إنها طلعت ع بكير لأنها جعلتني أتخذ قرارت هامة ومصيرية بحياتي ...
ودمتم سالمين وانشالله كل مالكم وبتصيروا أحلى وأحلى...إنتو وكل الناس الي بتحبوهم...
ميس محجوبة
LattakiaNews
تعليق المحرر:
1- لميس الغالية: تكرم عينك رح غير اللون واعمله بالأزرق ما بالأحمر .. بتأمري ميس
2-للسادة القراء : وردني مع هذا المقال ما هو باللون الأزرق أدناه.. علقوا عليه إن شئتم وانتقدوني لنشره إن احببتم
إستاذ فؤاد
كيف الصحة وكيف مدام ندى وعادل ولين ..
... بدي اطلب طلب اولا لاتنشر هالحكي.. إذا بتريد ثانيا عنجد إذا حسيت إنو المقال ماحلو بلاه
انشالله ماشوف هالكلام بوكرا بالخط الاحمر...
سلام وبشوفكن بالاجتماع يوم الاربعا ودمتم سالمين
del.icio.us |
Digg
أرسل إلى صديق
نسخة للطباعة
نسخة نصية كاملة
التعليقات (7 تعليقات سابقة):
فيقتي فيني حنين إضافي<أنا ناقصني>
من وين بدي جيب وحده متل احدى ستاتك لأتساير معها ,
بعدين اذا الشغله بالشعر الأبيض معناها أنا بلشت اكبر كتير وبناء على نظريتك معناها بلشت صير حلو كتير
شكرا عالتوضيح بالنسبه لمقال كتاب حياتي يا عين
وبما انني الان فهمت الموضوع فبسحب اقتراحي لأنو مش بمحلو ,انا كنت مفكر إنك غير مرئيه هيك فهمت من المقال لهيك قلت تاخدي لون
برجع بسحب الاقتراح
ووفقك الله وشكرا عالايضاح
واسمحي لي بأن أتشرف بدعوتك بصديقتي بالرغم أننا لم نلتقي, لكن موقعنا اللاذقاني الذي يجمعنا لا بد أن يجعل منا أصدقاء.....
قد أطربني لحن ما كتبتِ..... وأنشتني ألوانك في مقالك السابق....واسترجعت معك هاهنا سنوات كثيرة مرت وصرنا نذكرها كمن يبكي على الأطلال...
إنه عيدي الأول بعيداً عمن أحب....ضغط عمل حتى في أيام العيد......
المهم أن إحساس العيد وذلك البريق في عيني طفل ينظر إلى حذائه الجديد المخبأ تحت سريره في ليلة العيد منتظراً صباح اليوم التالي, ذلك البريق ما زال في عيني...
نعم يا آنستي لا يصنعنا العيد.....بل نحن من نصنعه....ونحن من نصنع سعادتنا....وطوبى لمن علمني مقولة:
إن لم يكن ما تريد....فأرد ما يكون.
كل عام والجميع بألف ألف خير.....
تصحيح المحرر: هذا ليس أول عيد يمر عليك بعيدا.. والباقي عندك
افتكرت انو لما بلعب لهاد العمر
بيكون عيب لان بابا بيبقى بيقلي الله مارح يكبرك بس انا ما بهتم لاكلام الكبار واذا شبت رح اعتبرو high lighting
أضف تعليقك