اللاذقية الإخبارية ::: أخبار اللاذقية لحظة بلحظة Lattakia News: كتاب حياتي يا عيني كتاب حياتي يا عيني ================================================================================ ميس محجوبة on 18 November, 2009 12:12:00 حبيت شارككم بمعاناتي المضحكة... طبعا هذه الأمور كانت تؤلمني بشدة فما كان مني الا ان قررت ان اعتبرها مواقف طريفة وقررت البوح بها حتى لاتزعجني بعد اليوم...لكن اود منكم التركيز معي لبرهة من الزمن .. يرعاكم الله فأنا فتاة من أب أزرق وأم حمراء ( الألوان هنا تدل على الطوائف والجنسيات و الأعراق كافة ) وجدي أسود وستي زهرية والمواقف المحرجة في هذا الوضع عديدة... فأينما أتواجد حالي كحال البطة السودة (أكيد جميعكم تعرفون القصة) فمثلا عندما أكون عند بيت جدي الحمر وعندهم شخص أحمر مثلهم ولا يدري أن أبي أزرق..وبيبلش ينتف بالزرق... فأنا هنا أقع في حيرة من أمري لأنو أذا ضليت ساكتة بكون تشتوشة ... وإذا حكيت..سأسبب لوالدتي الإحراج وأصغر كلمة بدها تنحكي الله يلعنها عل هالترباية.. لهيك يقولوا مية جبان ولا يقولوا الله يرحموا أما حالة بيت جدي الزرق ....فهي كالتالي... مرت عمي الكبير زرقاء من أم حمراء..مرت عمي الوسط بنية ...مرت عمي الكبيرصفراء أكيد هلأ إنتو عم تقولوا ....يا للإنسجام... للأسف الإجابة خاطئة ... لأنو الوضع سيئ والحالة ما يعلم بيها الإ ربنا وجدتي هنا ..شعارها بالحياة معاهم معاهم عليهم عليهم.... وتأييدها مع الذي يدللها أكثر ... فتراها يوم زرقاء ويوم صفراء ويوم خضراء وضعي بالمدرسة لم يكن أفضل... فآنسة الديانة لم تدخلني للصف لحتى إجت إمي ع المدرسة وبقيت تكن لي الكره الشديد كأنني قاتلة أبوها وكانت كل ما تسمعلي وخربط تصير تقول هههه لكن آنسة العلوم...تخيلوا أنها عندما كانت تشرح درس التهجين عند الأرانب ...نظرت إلي وابتسمت أما الموجهة فكان من المحبب لها جدا ... أن تنادي ....لك وينها هي السودا الي أمها حمرا الأعياد بالنسبة لي وجع راس ومجاملات عالفاضي...وحالتي كحالة الحزينة الي مالها مطرح والي بكل عرس مالها يا ننة عيني قرص أما بالنسبة للزواج ركزوا الله يخليكم ...فما بيمشي معي لا أزرق لأنو بدو يقول هه إمها حمرا وبدو يحطلي شروط .. والبني بيقول الله يحرسها بس أهلي ما يرضون والأحمر أنا بتنقرف رقبتي(لا بلاها دخيل الله) والبرتقالي بيقول الله يحميها كاملة مكملة بس ريتها برتقالية كان مشي الحال يعني لا أخضر ولا أزرق ولا أبيض ولا زهري مصفر ولا أحمر مزرق ولابينك ولا بلاك ماضل الا البنفسجي (شخص لا وجود له) يعني بلاها أحسن بعدين أنا خطيرة لأنو أي سلالة بدخل عليها خاربتها فورا ... وهناك مخاوف من أني جيب قطاط بدل الاولاد من كتر تخالط الجينات أحيانا بلوم أهلي لانو شعارهم الدائم احترام جميع الأديان والطوائف والأديان ..واحترام الناس لأنسانيتهم لاأكتر ولا أقل بس والله الي متلهم كتير قلال ... أو أنا يا عيني حظي التقي الناس الغلط باباكان يضحك من قلبو كاني عم احكيلو نكتة لما كنت احكيلو شي موقف اتعرضتلو... وع طول كنت قلو.. هلا انا مقهورة وانت عم تضحك وهيدا هوو السبب باني كتبت هالحكي اليوم ... لانو حسيت انها مواقف مضحكة وليست مخجلة ميس محجوبة LattakiaNews